Sipas mediave vendase, tensionet mes dy familjeve kishin ekzistuar për më shumë se një vit, ndërsa ftesa për pagëzim u konsiderua si një përpjekje për të zbutur mosmarrëveshjet. Njëri nga të ftuarit kishte thënë: “Merre dhuratën, nuk e di nëse do të jem gjallë”, duke paralajmëruar tensionin që do të ndihej më pas.
Konflikti shpërtheu të shtunën në mëngjes, duke u shndërruar shpejt në shkëmbim zjarri midis anëtarëve të dy familjeve. Forcat policore reaguan menjëherë dhe rrethuan zonën, ndërsa operacioni në terren për të vendosur rendin vijon ende.
Tre persona humbën jetën, përfshirë një burrë dhe një grua të re që nuk mbijetuan pas transportimit në Spitalin Venizelio, ndërsa viktimat e tjera dhe të plagosurit, përfshirë një fëmijë, u dërguan në spitalin Pagni. Policia ka vendosur masa sigurie në të dy spitalet për të shmangur përshkallëzimin e mëtejshëm të situatës.
Burimet lokale raportojnë se tensioni kishte filluar që mbrëmjen e kaluar pas shpërthimit të një pajisjeje artizanale në një shtëpi në ndërtim, që dyshohet se i përkiste njërës prej familjeve. Ngjarja ka trazuar thellësisht komunitetin lokal dhe përforcon nevojën për ndërhyrje të shpejtë policore dhe ligjore.