Nga rojtare objektesh në deputete: rruga e shpejtë e Zegjine Çaushit
Deputetja 27-vjeçare e Kuvendit të Shqipërisë, Zegjine Çaushi, është bërë një nga figurat më virale të legjislaturës së fundit, jo për aktivitet ligjor, por për gafat televizive dhe replikat e saj, përfshirë shprehjen e njohur: “O Gazooo, më rëntë pika!”. Ajo ka hyrë në Parlament përmes listës së Partisë Socialiste në Qarkun Fier, duke siguruar mandatin pas dorëheqjes së kandidatit më të votuar, dhe sot përfiton një pagë mbi 5,000 euro në muaj plus shtesa dhe privilegje të tjera.
Rruga e saj drejt Parlamentit është e veçantë. Deri më 12 shtator 2025, Zegjine Çaushi ka qenë e punësuar si rojtare në kompaninë shtetërore Illyrian Guard sha, ku ka marrë gjatë vitit elektoral 244,681 lekë. Kompania ishte nën administrimin e ish-deputetit Anduel Xhindin, dhe punësimi i saj si rojtare paraqet një kontrast të fortë me pozicionin që ajo sot mban në hierarkinë shtetërore.
Deklarata e pasurisë së deputetes rihap pikëpyetje mbi burimin dhe nivelin e kursimeve të saj. Në llogaritë bankare, Zegjineja ka deklaruar 14,987 euro dhe 197,237 lekë, ndërsa mban edhe 300,000 lekë të reja në shtëpi. Për një të re 27-vjeçare, me paga të ulëta në administratë, këto shuma janë më shumë se sa mund të kursejnë shumica e qytetarëve të moshës së saj në Shqipëri, duke ngritur dyshime për transparencën dhe burimin real të këtyre kursimeve.
Përveç punësimit si rojtare, Zegjine Çaushi ka pasur pozicione të tjera publike, përfshirë specialist në Emergjencat Civile të Bashkisë Roskovec dhe kryeinspektore në IMT, ku emri i saj është përfolur për raste të dyshuara abuzimi me detyrën. Po ashtu, ajo ka punuar në kompaninë private “Baze shpk”, e lidhur me familjen Krasniqi, të cilët kanë pasur më parë lidhje me administratën dhe vendimmarrës në Fier. Këto lidhje rrisin dyshimet për një rrjet mbështetjeje politike që e ka shoqëruar drejt karrierës së shpejtë.
Kontrasti mes karrierës së saj fillestare si rojtare objektesh dhe privilegjeve si deputete është i qartë. Përveç pagës, Zegjine Çaushi përfiton dietat, bonusin e strehimit, karburantin, telefoninë dhe pensionin parlamentar, edhe nëse nuk rikandidohet. Ky realitet nxjerr në pah mënyrën se si funksionon promovimi politik pa meritë, ku punësimet në ndërmarrje shtetërore shërbejnë si trampolinë, kursimet e pazakonta hapin pikëpyetje mbi burimet, dhe përgjegjësia në pozicione publike shpesh shmanget.