Gjykata e Lartë ka rrëzuar rekursin e paraqitur nga Ilir Meta, duke lënë në fuqi vendimin e Gjykatës së Posaçme të Apelit për Korrupsionin.
Vendimi u publikua sot, duke konfirmuar qëndrimin e ish-Presidentit në paraburgim.
Në njoftimin zyrtar thuhet se institucioni vendosi “mospranimin e rekursit të kërkuesit/të pandehurit Ilir Metaj, kundër vendimit nr. 183 (87-2025-284), datë 08.09.2025”, duke vulosur kështu fazën e apelimit.
Dosja ndaj Metës përfshin tre çështje të mëdha: aferën CEZ–DIA, lobimin e LSI-së në Shtetet e Bashkuara dhe hetimin pasuror, të cilat SPAK i konsideron pjesë të një skeme të gjerë financiare.
Ilir Meta dhe bashkëshortja e tij, Monika Kryemadhi, akuzohen për korrupsion pasiv, pastrim parash dhe mosdeklarim pasurie, akuza që ata i kanë mohuar vazhdimisht.
Ish-Presidenti ndodhet në burg që nga tetori i vitit të kaluar, ndërsa për Kryemadhin vazhdon masa e sigurisë “detyrim paraqitje”, në pritje të mbylljes së hetimeve të plota nga SPAK.