Tragjedi në Australi: Grua Vdes, Burri Plagoset nga Peshkaqeni
Një grua rreth të 20-ave humbi jetën, ndërsa një burrë i moshës së njëjtë u plagos rëndë të enjten në mëngjes, pasi u sulmuan nga një peshkaqen ndërsa notonin në plazhin Kylies, brenda Parkut Kombëtar Crowdy Bay në Australi. Viktimat ishin turistë nga Zvicra.
Burri u transportua me helikopter në spitalin e Newcastle në gjendje kritike, ndërsa gruaja ndërroi jetë nga plagët e marra në vendngjarje.
Autoritetet vlerësuan reagimin e shpejtë të një anëtari të publikut, i cili i ofroi ndihmë të parë burrit të plagosur përpara se të mbërrinin shërbimet mjekësore, duke i shpëtuar jetën. “Guximi i disa njerëzve në kohë si këto është vërtet i admirueshëm,” tha shefi i Shërbimit të Ambulancës së Uellsit të Ri Jugor, Josh Smith. Plazhi u mbyll menjëherë për siguri, ndërsa ekipet vendosën kurthe “inteligjente” për të etiketuar dhe liruar përsëri peshkaqenët.
Surf Life Saving NSW njoftoi se plazhet përreth do të mbeten të mbyllura për 24 orë dhe do të monitorohen me dronë. Drejtori ekzekutiv Steve Pearce u shpreh: “Ky është një rast tragjik dhe ne shprehim ngushëllimet tona më të thella familjeve të përfshira. I bëjmë thirrje turistëve të shmangin ujërat e rrezikshme dhe të ndjekin udhëzimet e rojeve të plazhit.”