Kupa e Botës 2026, që për herë të parë do të zhvillohet në SHBA, Kanada dhe Meksikë, ka vënë në lëvizje sportdashësit shqiptarë që shpresojnë të ndjekin nga afër ndeshjet në kontinentin amerikan.
Ambasada amerikane në Tiranë i ka bërë thirrje të gjithë qytetarëve të interesuar të aplikojnë sa më herët për vizë, duke theksuar se Shtetet e Bashkuara janë të përgatitura të përpunojnë fluksin e madh të kërkesave për eventin global. “Ne i inkurajojmë udhëtarët e huaj që kanë nevojë për viza amerikane të aplikojnë tani”, tha ambasada në njoftimin zyrtar.
Entuziazmi është rritur ndjeshëm pasi Shqipëria ka siguruar një kualifikim historik në fazën play-off të Botërorit, falë fitores ndaj Andorrës dhe humbjes së Serbisë në Angli. Ky zhvillim e rrit edhe më shumë interesin e tifozëve kuqezi për të qenë të pranishëm në takimet vendimtare, duke e bërë aplikimin e parakohshëm për viza një hap të domosdoshëm për ata që duan të ndjekin ëndrrën botërore nga stadiumet e Amerikës së Veriut.