Kreu i Partisë Demokratike, Sali Berisha, deklaroi nga foltorja e protestës në bulevardin “Dëshmorët e Kombit” se opozita nuk do të tërhiqet nga sheshi deri në largimin e kryeministrit Edi Rama.
Ai u shpreh se nuk do të hyjë më në asnjë proces zgjedhor me Ramën në pushtet, duke e akuzuar qeverinë për korrupsion, kapje të institucioneve dhe bashkëqeverisje me grupet kriminale. Berisha theksoi se ekonomia po dëmtohet, se puna po shkatërrohet dhe se emigracioni po rritet si pasojë e, sipas tij, keqqeverisjes dhe ndikimit të trafikut të drogës.
Duke intensifikuar akuzat ndaj mazhorancës, Berisha deklaroi se parlamenti është kthyer në një institucion të “turpshëm”, ndërsa paralajmëroi se Rama po kërkon të diktojë edhe Gjykatën Kushtetuese. Ai tha se PD nuk pret shpëtim nga gjyqtarët, por nga fuqia e qytetarëve që sipas tij do të vijojnë qëndresën pa u larguar nga sheshi. “Kemi hyrë në betejën vendimtare dhe me Ramën nuk shkojmë kurrë në zgjedhje”, u shpreh Berisha, duke nënvizuar se protesta do të vazhdojë deri në realizimin e qëllimit final: largimin e kryeministrit.