Qëndrimi ulur për orë të gjata po konsiderohet një nga rreziqet kryesore të stilit modern të jetesës, pasi ngadalëson qarkullimin e gjakut dhe krijon probleme serioze në organizëm.
Sipas specialistëve të Qendrës për Mjekësinë e Gjumit në Universitetin e Torontos, lëngjet që grumbullohen në këmbë gjatë ditës mund të zhvendosen në zonën e qafës gjatë natës, duke vështirësuar frymëmarrjen dhe ndikuar negativisht në cilësinë e gjumit. Gratë që kanë një mënyrë jetese sedentare raportohen me rrezik të rritur për mpiksje gjaku, çka e bën uljen e vazhdueshme një faktor të qartë rreziku për komplikacione kardiovaskulare.
Përveç organeve të brendshme, dëmet prekin edhe sistemin muskuloskeletor.Ulja e gjatë në të njëjtën pozicion ndikon menjëherë në shpinë, duke shkaktuar dhimbje të forta për shkak të presionit mbi disqet dhe muskujt. Qëndrimi i keq përpara ekranit është një tjetër problem që përkeqëson gjendjen, duke sjellë ngarkesë të shtuar në qafë dhe shpatulla. Ekspertët theksojnë se ndërprerjet e shkurtra, lëvizja dhe zgjedhja e një pozicioni të saktë uljeje janë masa të thjeshta, por thelbësore, për të shmangur pasojat e stilit të jetesës sedentare.