Një mjek nga Kalifornia, Dr. Salvador Plasencia, u dënua me 30 muaj burg për sigurimin e ketaminës që çoi në vdekjen e aktorit të “Friends”, Matthew Perry.
Plasencia ishte pjesë e një rrjeti të paligjshëm shpërndarjeje droge në Hollywood dhe është i pari i dënuar në kuadër të hetimit federal. Katër të pandehur të tjerë kanë pranuar fajësinë dhe pritet të marrin vendimin në muajt e ardhshëm.
Mjeku kishte pranuar fajin për katër akuza shpërndarjeje ketamine, ndërsa në një letër për gjykatën kërkoi falje dhe tha se mbante përgjegjësinë e plotë për veprimet e tij. Familjarët e Matthew Perry dhanë dëshmi të ashpra, duke e akuzuar mjekun për shkelje të betimit profesional dhe tradhti ndaj misionit të mjekësisë. Ata theksuan se vendimet e mjekut kishin pasur ndikim të drejtpërdrejtë në fatin e aktorit.