Në mbledhjen e sotme të Kryesisë së Partisë Demokratike, e zhvilluar pa praninë e mediave, janë zhvilluar debate të forta për çështjen e Avokatit të Popullit dhe organizimin e protestës së radhës. Kreu i PD-së, Sali Berisha, e cilësoi firmosjen për Avokatin e Popullit si një gabim të rëndë politik, duke kërkuar që deputetët që kanë firmosur të dalin publikisht dhe të kërkojnë falje, ndërsa theksoi se PD nuk do ta çojë çështjen në Gjykatën Kushtetuese.
Tensionet u shtuan edhe më tej pas reagimit të Bislim Ahmetajt, i cili akuzoi sekretarin e përgjithshëm Flamur Noka për çorganizim të partisë dhe për përgjegjësi direkte në këtë situatë. Ahmetaj u shpreh se me këtë qasje po neglizhohen demokratët dhe se do të jetë e vështirë të mobilizohen qytetarët për protestë, duke shtuar se, pavarësisht përplasjeve të mëparshme, në këtë rast i jep të drejtë Ervin Salianjit për lëvizjet e fundit politike.