Mesazhi i Trump për “liri në Iran” shihet si paralajmërim për ndërhyrje ushtarake, ndërsa Garda Revolucionare akuzon SHBA dhe Izraelin për organizimin e protestave.

Demonstratat masive, dhuna shtetërore dhe blackout-i i internetit kanë futur vendin në spirale destabilizimi. Bota mban frymën, Uashingtoni llogarit orën….

Shtetet e Bashkuara duket se po lëvizin drejt një përplasjeje të drejtpërdrejtë me regjimin iranian, në një moment kur vendi është përfshirë nga protesta masive kundër teokracisë në pushtet.

Presidenti amerikan Donald Trump deklaroi në rrjetin Truth Social se “Irani po sheh nga liria, ndoshta si asnjëherë më parë” dhe shtoi se SHBA janë “gati të ndihmojnë”.

Mesazhi i tij u interpretua si paralajmërim për një ndërhyrje të mundshme ushtarake, ndërsa njerëz pranë rrethit të tij, përfshirë senatorin Lindsey Graham, u shprehën qartë se “ndihma është rrugës”.

Wall Street Journal raportoi se brenda administratës Trump kanë nisur diskutime paraprake për një sulm ajror të shkallës së gjerë mbi objektiva ushtarake iraniane, nëse shihet e nevojshme. Sipas burimeve, megjithëse nuk ka ende një konsensus të plotë mbi planin e veprimit dhe nuk është vërejtur lëvizje konkrete ushtarake në terren, skenarët ekzistojnë dhe janë në shqyrtim.

 

Ndërkohë, lëvizjet e Trump shoqërohen nga një retorikë gjithnjë e më e ashpër. Senatori Graham u dërgoi një mesazh të drejtpërdrejtë protestuesve iranianë, duke shkruar se “ëndrra e keqe juaj po merr fund” dhe se kur Trump thotë “Make Iran Great Again”, ai nënkupton fundin e regjimit të Ajatollahut. Ky mesazh u ripostua menjëherë nga presidenti amerikan.

Nga ana tjetër, regjimi iranian është futur në gjendje alarmi. Garda Revolucionare deklaroi se ruajtja e sistemit është “vijë e kuqe”, duke akuzuar “grupe terroriste” për organizimin e trazirave dhe duke drejtuar gishtin nga SHBA dhe Izraeli si nxitës të dhunës. Agjencia e inteligjencës së Gardës konfirmoi arrestimin e një të huaji me dyshimin se kryente spiunazh për Izraelin.

Ndërkohë, situata në terren mbetet kaotike dhe e vështirë për t’u vlerësuar në mënyrë të pavarur për shkak të ndërprerjes së vazhdueshme të internetit. Megjithatë, video të verifikuara nga Reuters tregojnë turma të mëdha protestuesish në lagje të Teheranit, me zjarre në rrugë dhe thirrje si “Vdekje diktatorit” dhe “Vdekje Khamenei-t”. Në disa raste, protestuesit kanë marrë kontrollin e zonave të tëra. Një demonstrues nga lagjja Saadat Abad dëgjohet të thotë se “ne e kemi marrë lagjen”.

Televizioni shtetëror raporton sulme të “elementëve të dhunshëm” ndaj ndërtesave publike. Një ndërtesë komunale në Karaj është djegur, ndërsa janë transmetuar pamje të funeralëve të pjesëtarëve të forcave të sigurisë të vrarë gjatë përplasjeve në qytete si Shiraz, Kom dhe Hamedan.

Protestat nisën më 28 dhjetor si reagim ndaj krizës ekonomike, inflacionit galopant dhe kostos së jetesës, por shumë shpejt morën një karakter politik të hapur. Sloganet tashmë sfidojnë drejtëpërdrejt legjitimitetin e udhëheqjes supreme fetare dhe vetë Ajatollahut Ali Khamenei.

Ndërsa Teherani mobilizon mekanizmat e dhunës për të mbijetuar, Uashingtoni duket gjithnjë e më i gatshëm të përfshihet përtej retorikës. Pyetja nuk është më nëse SHBA do të ndërhyjnë, por si, kur, dhe çfarë pasojash do të sjellë kjo në një rajon që tashmë gjendet në buzë të shpërthimit.