Industria e automobilave po hyn me shpejtësi në një epokë të re, ku çelësat tradicionalë po zëvendësohen nga çelësat dixhitalë dhe teknologjitë e zhbllokimit nga distanca. Kjo risi synon jo vetëm lehtësi më të madhe për përdoruesit, por edhe siguri të avancuar kundër vjedhjeve. Sipas një raporti nga ABI Research, deri në vitin 2031 mbi 59 milionë automjete do të jenë të pajisura me këto sisteme, krahasuar me 15.6 milionë në vitin 2023. Hapat e parë nisën që në vitet 1990, kur Siemens prezantoi SmartKey, teknologji që më pas u adoptua nga Mercedes-Benz.
⏩𝐊𝐋𝐈𝐊𝐎 𝐊𝐄𝐓𝐔⏪ 𝐏𝐄𝐑 𝐓𝐄 𝐋𝐄𝐗𝐔𝐀𝐑 𝐋𝐀𝐉𝐌𝐈𝐍 𝐄 3..!!!
Një kthesë e madhe ndodhi në vitin 2018, kur BMW lançoi çelësin e parë dixhital të bazuar në smartphone me teknologjinë NFC, duke lejuar zhbllokimin dhe ndezjen e makinës pa çelës fizik. Që atëherë, zgjidhje të ngjashme janë përhapur te markat premium, përmes aplikacioneve, portofoleve dixhitale dhe orëve inteligjente. Gjenerata e ardhshme mbështetet në teknologjinë ultra-wideband, që mundëson gjurmim shumë të saktë të vendndodhjes dhe akses pa prekur fare telefonin. Në bashkëpunim me Apple dhe Car Connectivity Consortium, BMW zhvilloi standardin Digital Key 3.0, i cili lejon konfigurim të thjeshtë, ndarje të çelësit në deri në 18 pajisje dhe nivele të ndryshme aksesi për përdorues të ndryshëm.
Edhe Volkswagen, përmes degës së saj Cariad, ka zhvilluar një sistem që kombinon ultra-wideband dhe Bluetooth Low Energy, tashmë i disponueshëm në modele si Audi Q6 E-tron, A6 E-tron, A5 dhe Q5. Përfitimi kryesor është rritja e sigurisë dhe e angazhimit të shoferëve me shërbimet dixhitale të prodhuesve. Në të ardhmen, teknologji si njohja e fytyrës pritet të shtojnë edhe më shumë mbrojtjen. BMW ka paralajmëruar se Digital Key Plus do të bëhet standard në modelet Neue Klasse, duke shënuar përfundimisht fundin e epokës së çelësit tradicional dhe një hap të madh drejt makinave më të zgjuara, më të sigurta dhe më të lidhura. / CNN