Kryeministri Edi Rama, gjatë fjalës së tij në Parlamentin izraelit, ka falënderuar homologun Benjamin Netanyahu për ftesën, duke nënvizuar marrëdhëniet historike mes Shqipërisë dhe popullit hebre. Rama e cilësoi Shqipërinë si një vend që ka qenë gjithmonë strehë e sigurt për hebrenjtë, duke e quajtur këtë një vlerë të rrallë në historinë evropiane.
Gjatë fjalimit, kreu i qeverisë përdori edhe nota humori, duke u shprehur se do të përpiqej “t’i mbijetonte gjykimit” të Netanyahut, teksa tha se ishte spikeri i dytë ndërkombëtar që fliste në Parlamentin izraelit pas presidentit amerikan Donald Trump. Rama foli edhe në plan personal, duke theksuar se bashkëjetesa dhe respekti mes feve janë pjesë e identitetit shqiptar.
Ndër të tjera, Rama theksoi se Shqipëria është i vetmi vend në Evropë që nuk ka dorëzuar asnjë hebre gjatë Luftës së Dytë Botërore, duke e cilësuar këtë si një dëshmi të vlerave morale të shqiptarëve. Ai shtoi se Parlamenti shqiptar ka votuar për aderimin në një iniciativë ndërkombëtare për paqen, e cila sipas tij hap një perspektivë të re për kontributin e Shqipërisë në përpjekjet për paqe në Gaza dhe rajon.