Tronditëse në Napoli: Vëllai ther me thikë motrën e tij, pranon krimin në telefonatë
Një ngjarje e rëndë ka tronditur qytetin e Napolit, ku një 25-vjeçar, Vincenzo Riccardi, telefonoi numrin 112 për të rrëfyer se kishte vrarë me thikë motrën e tij, 23-vjeçaren Noemi Riccardi. Kur karabinierët mbërritën në vendngjarje, gjetën vajzën të pajetë, ndërsa vëllai i saj pranoi menjëherë autorësinë e sulmit, duke deklaruar se kishte vepruar në një “gjendje çmendurie”.
Sipas hetuesve, menjëherë pas krimit, Vincenzo bëri edhe një video-telefonatë me nënën e tyre, duke i treguar trupin e vajzës. Karabinierët e stacionit të Nolas e arrestuan në vendngjarje, ndërsa Prokuroria ka nisur hetimet për të zbuluar motivet dhe rrethanat e ngjarjes. Arma e krimit, një thikë kuzhine, u sekuestrua nga autoritetet.
Burimet hetimore bëjnë të ditur se të dy vëllezërit trajtoheshin në të njëjtën qendër të shëndetit mendor në Nola. Hetimet po fokusohen te historiku mjekësor dhe dinamikat familjare që mund të kenë çuar në krimin e rëndë. Vëllai pranoi se ishte i acaruar dhe nuk mund ta duronte më motrën, ndërsa prokuroria po verifikon deklaratat dhe çdo provë për të rindërtuar ngjarjen.
Sipas vlerësimeve paraprake, Noemi është goditur të paktën gjashtë herë. Në momentin e sulmit, nëna e tyre nuk ndodhej në shtëpi, ndërsa Vincenzo nuk ka pasur më parë precedentë për dhunë në familje. Mjekët e emergjencës konfirmuan vdekjen e vajzës sapo mbërritën në vendngjarje, pa mundur të bëjnë asgjë për ta shpëtuar.Policia dhe prokuroria po vijojnë hetimet për të zbardhur plotësisht motivin dhe për të rivlerësuar çdo element të historisë familjare që mund të shpjegojë këtë ngjarje tragjike. Banorët e Napolit janë tronditur nga ngjarja, ndërsa autoritetet bëjnë apel për kujdes dhe bashkëpunim me hetuesit për informacion shtesë.