Artan Hoxha paralajmëron aferë të re korruptive për Ballukun: ‘Tigrat’ në Vlorë paguhen pa prodhuar energji
Gazetari Artan Hoxha, i ftuar në një emision televiziv për të diskutuar masat e sigurisë të dhëna nga SPAK për zv/kryeministren Belinda Balluku, tha se në horizont duket një tjetër aferë korruptive që lidhet me të. Ai u ndal tek anijet termocentral të emërtuara “Tigri 1” dhe “Tigri 3”, të ankoruara në Vlorë, për të cilat shqiptarët paguajnë 94,500 euro qira mujore, pavarësisht nëse prodhojnë energji apo jo.
Hoxha shpjegoi se këto anije janë ndezur disa herë vetëm për t’u treguar publikut dhe institucioneve se prodhojnë energji, por në realitet ato nuk punojnë me kapacitet të plotë dhe vetëm ndotin Gjirin e Vlorës. “Këta i kanë ndezur për të treguar që tigrat edhe punojnë, edhe prodhojnë energji, por vetëm ndot Vlorën,” tha gazetari. Ai theksoi se kontrata për këto anije është shumë e shtrenjtë dhe ka shkaktuar një dëm financiar të madh për buxhetin e shtetit, për shkak të rendimentit të ulët të tyre.
Sipas Hoxhës, promovimi i ardhjes së “Tigrave” u mbështet edhe nga diplomacia amerikane, pasi ambasadorja amerikane në Shqipëri, pas largimit nga detyra, u punësua në kompaninë që solli anijet në vend. Kjo lidhje, sipas tij, tregon një rrjet përfituesish të jashtëm dhe të brendshëm, ku përfituesi politik brenda Shqipërisë është ai që ka marrë mbështetje diplomatike.
Gazetari shtoi se ndezja e anijeve u bë edhe pas kallëzimeve të mundshme për abuzim, si për të treguar aktivitet dhe për të justifikuar pagesat e larta. Ai theksoi se situata shfaq një aferë të gjerë korruptive, ku Balluku është drejtpërdrejt përgjegjëse si ministre që solli këto anije, ndërsa përfituesit e jashtëm dhe të brendshëm përfitojnë nga marrëveshja e dyshimtë.
Hetimi dhe transparenca mbi këtë çështje, sipas Hoxhës, janë thelbësore për të zbuluar lidhjet politike dhe ekonomike që qëndrojnë pas projektit, përfshirë pasojat financiare dhe ndikimin e mundshëm mbi politikat energjetike të vendit. Ai paralajmëroi se kjo çështje mund të hapet në çdo moment dhe mund të bëhet një tjetër aferë korruptive me përmasa të mëdha.
..