Big Mama kujton Shpat Kasapin: “Gjithmonë buzëqeshës, kërkesa e fundit ishte të këndonim ‘Sajzeza’”
Big Mama u shfaq me lot në sy gjatë një lidhjeje të drejtpërdrejtë në emisionin “Ftesë në 5” me Bieta Sulon, duke kujtuar momentet me artistin e ndjerë, Shpat Kasapi. Ajo rrëfeu se njiheshin që nga viti 1997 dhe kanë qenë pjesë e të njëjtës gjeneratë artistësh.
“Të gjitha fotot i ka duke qeshur. Nuk ka patur në estradën tonë artist më të buzëqeshur se Shpati. Edhe kur ziheshe me të, ai të kthente përgjigje me buzëqeshje. Kujtimet më të bukura do të mbeten tek ne. I them familjes së tij, Zoti u faltë durimin dhe ta kujtojmë në mënyrën më të bukur”, tha Big Mama.
Ajo kujtoi edhe kërkesën e fundit të Shpatit: gjatë një regjistrimi festiv, ai i kishte propozuar që të këndonin së bashku këngën “Sajzeza”. “Më tha a t’a këndojmë bashkë ‘Sajzeza’ meqenëse jemi të dy tetovarë. I thashë ‘do e këndojmë o Shpat’. Kush e mendonte se kjo do të ishte kujtimi i fundit me të”, shtoi ajo.
Big Mama tregoi edhe fillimet e miqësisë së tyre: “Jemi rritur bashkë, kemi qenë fëmijë me shumë dëshirë për të arritur sukses. Kujtoj paraqitjen tonë në Festivalin e Fëmijëve në 1997, koncertet, rrugëtimet, të qeshurat dhe shakatë që kemi bërë”.
Përsa i përket kontakteve me familjen e Shpatit, ajo tha: “Nuk kam folur direkt me nënën e tij, por kam komunikuar me të afërmit. Nuk kam forcë të shkoj, por do të shkoj”.