Është ndarë nga jeta në mënyrë të parakohshme mjekja psikiatre Arlinda Tomçini, në moshën 49-vjeçare, duke lënë pas dhimbje të thellë te familjarët, kolegët dhe komuniteti mjekësor. Lajmi i trishtë është bërë i ditur nga Spitali Universitar i Traumës, ku ajo shërbeu për vite me radhë. Ndarja e saj ka tronditur të gjithë ata që e njohën nga afër.
Për më shumë se 10 vite, Dr. Arlinda Tomçini shërbeu me përkushtim, profesionalizëm dhe humanizëm si pjesë e Njësisë Mjekësore Ushtarake. Ajo u vlerësua për kontributin e saj të çmuar në trajtimin e pacientëve dhe bashkëpunimin me kolegët. Figura e saj mbetet një shembull i përkushtimit ndaj misionit të mjekut.
Kolegët e Spitalit të Traumës shprehën dhimbjen e thellë për humbjen e saj dhe ngushëllimet më të sinqerta për familjen. Humbja e Dr. Arlinda Tomçinit konsiderohet e madhe jo vetëm për institucionin, por për gjithë mjekësinë shqiptare. Kujtimi dhe vlerat e saj profesionale do të mbeten gjithmonë të gjalla.