Ajo që nisi si një “sfidë durimi” brenda Big Brother VIP Albania u shndërrua në një situatë shqetësuese, që vuri në diskutim kufijtë e formatit. Sfida e ideuar nga Lori Caffe kërkonte që banorët të mbanin këmbët në ujë me akull për sa më gjatë. Në praktikë, kjo provë kaloi nga argëtim në rrezik real për shëndetin, ndërsa disa prej banorëve e ndërprenë për shkak të dhimbjeve të forta.
Pesë banorë – Brikena, Artan, Mal, Rogert dhe Anxhelo – qëndruan plot 7 orë në ujë me akull, duke e çuar sfidën në një ekstrem të rrezikshëm. Pas përfundimit, Artan Kola shfaqi gjakderdhje dhe dëmtime në këmbë, fakt që u vu re edhe nga banorët e tjerë. Ajo që shtoi shqetësimin ishte menaxhimi i situatës nga produksioni, ku diskutimet u ndërprenë dhe kamerat u shmangën.
Ekspertët paralajmërojnë se ekspozimi i zgjatur ndaj të ftohtit mund të dëmtojë qarkullimin e gjakut, nervat dhe lëkurën, duke rritur rrezikun për infeksione dhe hipotermi. Në momentin që shëndeti vihet në rrezik real, nuk flitet më për lojë apo show. Një format i tillë ka detyrimin të vendosë kufij të qartë, ndërsa përgjegjësia kryesore bie mbi produksionin dhe Top Channel, për të mos normalizuar situata që mund të kenë pasoja serioze.